#窮撚麻甩佬 | #mll港式 #mll深水埗
近排香港興懷舊，我麻甩佬都唔執輸😎，去試番間七十年代舊香港裝修既冰室，打打卡。冰室入面唔少海報、壁畫、射燈等都十分有味道。入到去睇到個menu發覺原來間餐廳啲食物都係比較新派啲唔太懷舊，但係最緊要都係食物質素。
-
✨芝士雞扒撈一丁配牛油厚多士 $48
先講講個一丁，麵既質地太冧淥得太過耐，唔夠彈牙。再講講個芝士汁，連唔食芝士既我都覺得接受到，證明個芝士汁都冇乜芝士味，淨係得咸味🤨 其次塊雞扒真係非常非常之咸，仲咸過我個人... 個牛油厚多士冇乜特別，唔好食又唔會難食。
-
✨芝士牛肉濃茄湯通粉配牛乳炒蛋肉醬焗薯泥 $48
雖然個通粉上碟果陣有大大塊芝士係面頭，但食落都係冇乜芝士味。蕃茄湯唔算好濃，甜酸既比例岩岩好，算係合格。炒蛋炒得有少少過熟、唔夠嫩。肉醬薯泥反而比較好食，甜甜酸酸咁好開胃，但肉醬入面好少肉粒，唔係好夠誠意。
-
✨飛仔華田 +$14
其實係一杯普通凍華田，面頭有層忌廉加少少穀物早餐。最令我不解既係點解一杯凍華田面頭係落美祿穀物早餐果啲波波🤯，學麥記既阿華田雪糕咁加番啲機智豆會match啲，唔好又美祿波波又蜜糖星星咁好似亂砌杯特飲出黎，十四蚊完全唔值。
整體黎講，個人認為成間鋪食物水準合格差少少，唔好食同埋唔會想再食，上網睇好多正評，本身都係本住食好西咁心態去試下，點知個落差咁大，認真好失望。
店鋪：良記餐廳（老鳳冰室）
地址： 深水埗基隆街216號地鋪
營業時間：07:00 - 22:00 @ 老鳳冰室 "Lo Fung Restaurant'
Search